Книгагудо

Книгагудо нерген информаций

1988 ий – Марий Эл Республикын кӱшыл да кокла профессионал шинчымашым пуышо тӧҥеж-влакын методике рӱдерже. Тиде ушемыш 14 книгагудо пура.

1996 ий – Деловой книгагудо-влакын регион-влак кокласе ассоциацийын членже.

1997 ий – Российысе шанче-технике книгагудо-влакын тӱнямбал ассоциацийын членже.

1999 ий – Россий книгагудо-влакын ассоциаций членже («Вузысо книгагудо-влак» секций).

2003 ий гыч – МАРС проектын участникше

2007 ий – АБРИКОН (Регион-влак кокласе книгагудо консорциум-влакын ассоциацийже) пелен эртаралше ЭДД (документ-влакым электронно намиен шуктымаш) проектын участникше

1998 ий гыч книгагудо пелен Информаций шотышто образованийлан полышым пуышо рӱдер пашам ышта. Тышке школ книгагудо-влакат пурат, тыштак Европа Ушемын информаций рӱдерже верланен (кызыт тудо университетысе тӱнямбал кыл пӧлкаште).

2013 ийын 1-ше шорыкйол тылзе гыч книгагудын штатыштыже 86 еҥ шотлалтеш. Тудын книга фондыштыжо 1 180 052 экземпляр аралалтеш. Книгагудо чылаже 14 тӱжем утла еҥ дене пашам ышта.

Тачысе кечылан тыште 13 пӧлка, лудшо-влаклан келыштарыме 7 зал да 7 абонемент. ЭВМ паркыште 107 единице, 38 автоматизироватлыме паша вер.

1997 ий гыч тӱвыра да сымыктыш факультетысе (кызыт калыкле тӱвыра да тӱвыра кокласе коммуникаций институт) книгагудо пӧлкан студентше-влаклан практикым эртарымаште да шанче пашам виктарымаште тӱҥ верым налын шога.

2008 ий шорыкйол тылзын МарКУ-н Шанче книгагудыж деке Н.К. Крупская лӱмеш Марий кугыжаныш педагогике институтын тыгаяк пӧлкаже ушалтын.

Тыге у пӧлка-влак почылтыныт:

- шанче литератур дене полышым пуышо пӧлка;

- калыкле да краеведений литератур пӧлка.

Вес пӧлка-влак деке ушалтше-влакат лийыныт:

- гуманитар шинчымашым шарыше пӧлка – гуманитар да сотемдарыме пашам эртарыше пӧлкашке;

- книгагудо процессым автоматизироватлыше пӧлка – медиатеке секторан электрон ресурс пӧлкашке;

- лудшо-влакым обслуживатлыше пӧлка – тунемме литератур дене обслуживатлыше пӧлкашке

Юридический факультет пелен улшо книгагудын филиалже ты факультетынак комлексный пӧлкашкыже куснен. Книгам аралыме тӱҥ пӧлкаште шуэн вашлиялтше книга сектор ышталтын.