Увер-влак

31.03.2017

МарКУ-што «Туныктышын кушмо корныжо» семинар эртен

30 мартыште Калыкле тӱвыра да тӱвыра кокласе коммуникаций институтын студентше-влаклан «Туныктышын кушмо корныжо» теме дене семинар эртен. Тудын тӱҥ шонымашыже – ончыкылык педагог-влакым тачысе школышто туныктымо паша деке тӱҥ требований-влак дене палдараш, педагогический коллективын да посна туныктышын творческий потенциалжым вияҥдыме корным палемдаш.

Нине йодыш-влакым рашемдымашке Волжск район Карай кыдалаш школын вуйлатышыже Любовь Анатольевна Сергеева кумылын ушнен.

Любовь Анатольевна Сотнур кундемын шочшыжо. Тудо 1977-ше ийыште Марий кугыжаныш университетын руш-марий пӧлкажым тунем пытарен. Вара туныктышо семын ыштыме пашаже Карай кыдалаш школышто тӱҥалын: туныктышо, директорын алмаштышыже лийын. Ынде ятыр жап школ вуйлатыше семын тырша. Уста туныктышын паша лектышыже кӱкшын аклалтын. Тудо «Марий Эл Республикысе образованийын сулло пашаеҥже» да «Россий Федерацийын общий образованийжын почетный пашаеҥже» лӱм-влакым сулен налын.

Чолга вуйлатыше шочмо йылмын пӱрымашыже, тудым арален да вияҥден шогымаште туныктышын верже, чумыр педколлективын туныктымо да творческий пашалан кумылаҥдыме корно-влак нерген кумыл нöлтын каласкалыш. Тудын ойжо почеш, кажне туныктышо шке предметшым сайын палышаш да шке ыштыме пашажым йӧратышаш, тунам веле тудын пашаже лектышан, а илыш корныжо волгыдо лиеш.

Йылме технологий шотышто шанче-туныктымо «Марий йылме» рӱдер

Короткая ссылка на новость: http://marsu.ru/~up2UE
ВКонтакт Facebook Google Plus Одноклассники Twitter Livejournal Liveinternet Mail.Ru