Увер-влак

10.04.2017

МарКУ-што «Мастарлык йолгорно» творческий семинар эртен

2017 ий вӱдшор тылзын 7 кечынже Марий кугыжаныш университетысе калыкле тӱвыра да тӱвыра кокласе коммуникаций институтышто «Мастарлык йолгорно» кокымшо туныктымо семинар эртен. Семинарыш почеламутым, йомакым, ойлымашым возышо республик школлаште тунемше йоча-влак да нунын туныктышышт, тыгак МарКУ-н студентше-влак толыныт.

Погынышо-влакым институтын директоржо Р.И.Чузаев саламлен да нунылан сай паша лектышым тыланен. Тиде поро пашалан тӱҥалтышым пыштыше, Олык Ипай лӱмеш кугыжаныш премийын лауреатше, самырык поэтесса Татьяна Светлакова «Мастарлык йолгорно» мероприятийын тӱҥ шонымашыж дене палдарен. Икымше семинарын участникше-влакын пашаштым чумырен лукмо «Волгыдо олык тӱрыштӧ» сборникын презентацийжым эртарыме. 4-ше курсын студентше-влак Алина Макарова ден Вероника Мустаева шке почеламутыштым сылнын йоҥгалтареныт. Умбакыже йоча-влаклан Марий Элын калык поэтше, «Ончыко» журналын тӱҥ редакторжын сомылжым шуктышо Геннадий Сабанцев-Ояр да самырык поэт, тиде журналын ответственный секретарьже Игорь Попов тунемше-влакын произведенийыштым лончыленыт, ятыр поро каҥашым пуэныт.

Кажне участниклан сертификат ден книга пӧлекым кучыктымо. Эн сай паша-влакым савыктен лукташ палемдыме.

Короткая ссылка на новость: http://marsu.ru/~WdELg
ВКонтакт Facebook Google Plus Одноклассники Twitter Livejournal Liveinternet Mail.Ru