Увер-влак

24.05.2017

МарКУ-што Педагогике институтым почмо

2017 ий 22 майыште Марий Эл Республикын опорный вузшын, Марий кугыжаныш университетын, у структур подразделенийжым – Педагогике институтым – торжественно почмо. Тудым педагогике науко кандидат, профессор Елена Кондратенколан вуйлаташ ӱшаныме.

Пединститутым почмо нерген пунчалым Марий Эл Республикын кӱшыл педагогике образованийлан 85 ийаш лӱмгечым палемдыме идалыкыште, 2016 ий 28 декабрьыште, лукмо. Институтым торжественно почмо дате 1931 ий 22 майыште мемнан республикыште икымше кӱшыл шинчымашым пуышо тöнежым – Марий Агропединститутым – почмо дене кылдалтын. 1932 ийыште Агропединститут Марий кугыжаныш педагогике институтыш савырнен, а вес ийынже тудлан Н.К.Крупскаян лӱмжым пуымо.

Мероприятийыш Марий Эл Республикын образований да науко министрже Наталья Адамова, республикысе профсоюз организаций-влакын ушемыштым вуйлатыше Ольга Цветкова, образований пашаеҥ-влакын профсоюзыштым вуйлатыше Людмила Пуртова, сар да паша ветеран, выпускник, туныктышо да вузын пашаеҥже да тыгак Педагогике институтын студентше-влак погыненыт.

«Пединститутым почмаш – тиде туныктымо паша ветеран да туныктышо-влаклан кугу пайрем. Нуно Педагогике институтын историйжым кызытат палат да шарнат, ме «пединститутыште тунемынна» манын кугешнен ойлат. Тачысе студент-влаклан институтын сай традицийжым уэш илышыш пурташ да кугешнен «Туныктышо» лӱмым нумалаш тыланем», − саламлен каласыш Наталья Адамова

«Ме ӱшанена, Пединститут Марий Эл Республикысе кӱшыл образований системын сай эҥертышыже лиеш», − палемдыш Марий кугыжаныш университетын ректоржо Михаил Швецов.

Мероприятийын торжественный ужашыштыже Н.К. Крупская лӱмеш Марий кугыжаныш педагогике институтын историйжым шарналтеныт, выпускник ден туныктышо-влаклан тау шомакым ойленыт да тыгак Пединститутын выпускникше-влакын ушемыштым ойырымо. Тушко ончычсо образований да науко министр Галина Швецова, МОСИ-н ректоржо Игорь Загайнов, профсоюз организацийым вуйлатыше Людмила Пуртова да молат пуреныт. Уна-влакын кумылыштым шке мастарлыкышт дене Педагогике институтын студентше-влак нӧлтеныт.

Мероприятийын ик ужашыштыже «ПЕДАГОГ 21 ВЕКА» конкурсым иктешленыт. Тиде конкурс – Педагогике институтын ик сай йӱлаже. Пайрем умбакыже спортивный эстафете, лингвострановедческий модыш, викторин, квест-влак да тыгак куштымаш флешмоб дене шуйнен. 

Короткая ссылка на новость: https://marsu.ru/~smfdQ
ВКонтакт Facebook Google Plus Одноклассники Twitter Livejournal Liveinternet Mail.Ru
Новая версия сайта