Творчество Наты Сергайык

Волгенче гае волгыдо шӱмна

Мардеж шӧртнялге лышташ погым
Вужгалше шыже мландышке кышка.
У шинчымаш капкажым почын,
Студент МарГУ-со лекцийыш вашка.

Могае ямле тиде илыш!
Сӧрал мо йолагайла шинчылташ?
Тунем да шымле! Тыршыметлан
Эн кугу надыр – шинчымаш.

Ушан книга лышташым шерын,
Волгенче гай волгалт йӱла шӱмна.
Ме пойдаралт наука велым,
Историй лончыш возена лӱмнам.

Кумда тӱнясе илыш пого
Студентын чонышто атылана.
Шке пӱрымашлан вуйын шого,
Тунам виян лиеш Россий элна.

Муро

Чоннам ушен ик ныжыл муро,
Ме коктын – шкетын – улына.
Нимо тетла мемнам ок кучо,
Кумда каваш чоҥештена...

Тек муро у куатым налын,
Чон сусыр палым паремда.
Тый волгалтат тунаре алын,
Йоҥгет Пеледыш пайремла.

Ме шӱдыр йӱр йымак логалын,
Ласкалык дене шӱлена.
Ший Тылзе корнышко шогалын,
Ваш йӧратен ме илена.

Мый...
Тый...

Мый – пушкыдо чонан изи лай кайык,
Тый – койышан, торжа мардеж-поран.
Ваш келшымаш адак конда тӱтаным,
Ал роза лывыжга, кылма полан.

Мый – тӱрлӧ тӱрлеман лум пырче,
Тый – теҥыз толкын гай кугу саман.
Шарналын, пиалет муаш ит тырше,
Вашлийын ойырлаш кӱшта амал.

Мый – шӱшпык мур ден темше шошо,
Тый – шыже мардежан пычкемыш йӱд.
Ончалтышет ден когарташ ит шоно,
Ты жап эртен, мый нимо деч ом лӱд!

Пӱртӱс – авам

Молан чонемым умыр касше
Пӱртӱс-авам дек наҥгая?
Ший шӱдырын яндар куатше
Шӱмемым утыр авалта.

Шуҥгалтын Оно вӱд эҥерыш,
Иям вӱдйогын ваштареш.
Мый йӱштыл лектым олык серыш,
Ӧндал шогальым ваштарем.

Памаш! Вӱдетын юзо тамже
У вийым мыланем пуа.
Изи ялемын сылне ямже
Кугу ӱшаным пӧлекла.

Ната Сергайык